Parku i Madh i Liqenit Artificial është masivi më i madh i gjelbër në qytetin e Tiranës. Nga pikëpamja funksionale zgjidh në një masë të caktuar nevojat e popullatës për pushim dhe rekreacion, liri të lëvizjes dhe vrapim për të gjitha moshat. Sipërfaqja e Parkut të Madh përbëhet nga një masiv kodrinor me shpate pak të pjerrëta. Në pjesën jugore formohet shtrirja ujore e Liqenit Artificial, i cili me shtrirjen e tij krijon gjire shumë të vegjël e piktoreskë.

Ndërtimi filloi në vitet 1950. Parku dhe liqeni artificial mbeten një nga zonat më të njohura të kryeqytetit. Parku i Madh quhet edhe mushkëria e qytetit për shkak të bimëve të shumta, mbi 120 llojeve të pemëve, shkurreve dhe luleve. Në park gjenden disa lloje shpendësh si: Bilbili, Bufi, Harabeli i Gurit, Kapelja e Ujit, Dallëndyshja e zakonshme, Gardalina etj. Ndër kafshët mund të përmendim: breshkat, hardhucat, disa lloje gjarpërinjsh, kërmijtë dhe shumë insekte që rriten nën tokë dhe mbi tokë. Sipërfaqja aktuale e Parkut të Liqenit Artificial është 156.9 ha, ndërsa ajo e Liqenit Artificial është 4.5 ha.